Претседателот Стево Пендаровски, во рамки на кампањата за подобра животна средина „Не игнорирај! Реагирај!“, денеска прими ученици од осум средни училишта од разни градови во Македонија.

Кампањата, која во организација на Институтот за комуникациски студии започна во март, се фокусира на постоечките ризици и последици од климатските промени во државата.

На средбата со учениците, претседателот Пендаровски ја истакна потребата секој од нас да посвети повеќе внимание во одржувањето на здравата животна средина, бидејќи правото на живеење во здрава животна средина е право на секој од нас. Претседателот истакна дека токму овој период од годината е круцијален за одржувањето на животната средина, бидејќи аерозагадувањето е многу повисоко и веќе ја надминува границата на дозволената јаглеродна емисија.

– Затоа очекувам здружени акции на релевантните институции, но и подадена рака од нашите граѓани кои освен што ќе преземат конкретни еколошки акции, ќе бидат и во улога на еколошка патрола или еколошки патроли и набљудувачи на загадувачите. Сите ние преку самокритичност и навремена и брза реакција треба да бидеме упорни во нашата заложба да имаме почиста и поздрава животна средина – рече претседателот Пендаровски.

„Не игнорирај, реагирај!“ е платформа која обединува експерти од различни области, граѓански активисти, екологисти, креатори на јавно мислење, невладини организации и граѓански иницијативи, медиуми и поединци со цел да се изложат проблемите со кои се соочуваме како заедница; да се насочат прашањата кон соодветните институции; и да се провоцираат решенија за подобра животна средина и квалитет на живеење.

Кампањата „Не игнорирај! Реагирај!“ се фокусира на три клучни теми: одржливи градови, почиста околина и климатски промени.

Кампањата спроведува повеќе активности во соработка со факултети, средни училишта, граѓански иницијативи и еколошки организации.

Текстот е првично објавен ТУКА.